نصائح مهمة للعرايس الجداد قبل القلق من تأخر الحمل

شوية نصايح للعرايس الجداد هتوفر عليكي كتير، ومعلش لازم نكررها كل شوية نفكر بيها الناس

متى نشخص تأخر الإنجاب؟

📌 بنشخص تأخر الانجاب بعد مرور سنة من العلاقة الزوجية المنتظمة بدون وسيلة منع حمل.

ومش لازم نعمل مناحة كل شهر لو الحمل ماحصلش.

لا تستعجلي الكشف لو دورتك منتظمة

📌 لو الدورة منتظمة (مرة كل شهر اغلب الوقت) وسنك اقل من 35 سنة، الاستعجال للكشف هيدخلنا في مشاكل كتير وتكاليف اكتر ممكن نتجنبها بالانتظار اول سنة.

📌 التفكير في الحمل والقلق من تأخر الحمل من اهم اسباب عدم انتظام الدورة اول الجواز وده بيأخر الحمل.

ضغط المجتمع والقلق

📌 يارب كل واحد يخليه في حاله، بس مش هنعرف نغير الكون. ماتخليش جملة (مافيش حاجة جاية في السكة) تعصبك، بس لو حد قالهالك ماتعوريهوش جامد.

أعراض الحمل الحقيقية

📌 اعراض الحمل اللي بتسمعي عنها بتظهر بعد سماع نبض الجنين، يعني بعد اختبار الحمل الايجابي باسبوعين.

يعني الدوخة والغممان اللي بيجولك قبل معاد الدورة دي غالبا اعراض حمل كاذب من كتر التفكير في الحمل.

📌 الحمل هيبان في اختبار الحمل (الرخيص اللي بنعمله في البول في البيت) وهنعيده بعد اسبوع لو مانزلتش الدورة.

هل لازم نحسب أيام التبويض؟

📌 حساب ايام التبويض وعمل جدول بالمواعيد مالوش اي داعي وغالبا بيأخر الحمل، الا لو الزوج بيسافر وعاوزة تظبطي ايام اجازاته.

العلاقة المنتظمة كل يوم او يوم ويوم من نهاية الدورة للدورة الجديدة بدون حساب هتكون افضل للحالة النفسية ولحدوث الحمل.

لو اكتشفتي ورم ليفي أو كيس على المبيض

📌 لو كشفتي بدري بدون داعي او وجود اعراض وعرفتي ان عندك ورم ليفي عالرحم او اكياس عالمبيض بلاش نقلق، لان في اغلب الاحيان مش بيأخرو الحمل.

القلق هو اللي هايأخر الحمل.

أول خطوة في تشخيص تأخر الحمل

📌 اول خطوة لتشخيص تأخر الحمل بيكون تحليل الزوج.

سامحيني لو ماعملتش اي اجراء لغاية ماشوف تحليل السائل المنوي للزوج حتي لو عندك مشاكل الدنيا والاخرة.

📌 لو دورتك مظبوطة يبقي غالبا الدكتور ادالك منشط عشان مايسيبش الروشتة فاضية بس مش اكتر (طبعا ده مش كل الحالات).

مشاكل العلاقة الزوجية أولى من علاج تأخر الحمل

📌 علاج التشنج المهبلي ومشاكل العلاقة الزوجية اولي من البحث عن اسباب تأخر الحمل.

بالعكس المفروض نأخر الحمل لغاية مانعالج التشنج المهبلي.

أهم عوامل تساعد على حدوث الحمل

📌 الاكل الصحي والمحافظة علي الوزن والبعد عن القلق والتوتر اهم الحاجات اللي هاتساعدنا علي حدوث الحمل بسرعة.

معلومات الطبيب

دكتور محمد فوزي الطويل
دكتوراه التوليد وأمراض النساء

📞 للحجز والاستفسار: 01020070798
📍 السويس، الاربعين بجوار مركز براعم للحضانات، شارع الفرز