نشيل الورم الليفي بس ولا الرحم كله؟ القرار الصحيح حسب حالتك

نشيل الورم الليفي بس ولا الرحم كله؟
سؤال كل يوم.

صلي علي رسول الله كدة وهنوضحها بالراحة.

الإجابة تعتمد على حاجتين فقط

إجابة السؤال بتعتمد علي حاجتين بس:

• • الرغبة في الانجاب

• • القدرة علي الانجاب

بس كدة بالبساطة دي.

لو شيلنا الرحم كله انت فقدتي القدرة علي الانجاب.
بس.

الرحم وظيفته انك تخلفي.
مالوش علاقة بالهرمونات.
مالوش علاقة بالأنوثة.
وبرضه مش هايأثر علي العلاقة الزوجية.

الأنوثة والهرمونات دي وظيفة المبيض، اللي ممكن مانجيش جنبه عادي لو لسة شغال ومافيهوش اورام.

ماذا لو استأصلنا الورم الليفي فقط؟

لو شيلنا الورم الليفي بس وحافظنا علي الرحم، كدة عندنا فرصة للحمل وممكن يحصل حمل.

لكن في احتمال بعد سنة أو اتنين أو تلاتة أو عشرة إن الرحم يكوّن اورام ليفية تانية ويعمل نزيف تاني ونضطر ندخل عمليات تاني.

وممكن كمان مايرجعش تاني وتبقي مشكلتنا اتحلت.

مثالين للتوضيح

لو عندك تلاتين سنة:

هنشيل الاورام الليفية ونسيب الرحم عشان يبقي في فرصة لحدوث حمل تاني، سواء كان ورم واحد أو خمستاشر ورم ليفي.

ولو طلبتي مني اشيل الرحم غالبا أرفض، وهحاول اقنعك نحافظ علي الرحم الا لو معاكي خمس عيال مثلا ومصممة.

في الحالات دي بنبقي حريصين جدا علي استئصال كل الاورام الليفية حتي الصغيرة جدا عشان نقلل احتمالية انها تكبر.

لان في حالات كتير لما بنشيل الاورام الكبيرة الدم كله بيتوجه للاورام الليفية الصغيرة وبتكبر بصورة سريعة.

طيب لو عندك خمسة واربعين سنة أو اكتر ومفيش فرصة لحدوث الحمل؟

يبقي من مصلحتك اننا نشيل الرحم كله.

انا عارف انها بتبقي ساعات نفسيا صعبة،
بس وقتها ده القرار الأقرب للصواب واللي هاحاول اقنعك بيه.

والقرار في الآخر هيرجع لك اكيد.

سؤال يومي آخر

هنجاوب في بوست تاني نعمل العمليات دي منظار ولا فتح بطن،
لان ده برضه تقريبا سؤال يومي.